Sunday, February 9, 2025

संपादक : अरविंद (आप्पासाहेब) सुर्वे

Homeआपले सरकारकोकणवासीयांना दुहेरी आरोग्यदायी भेट

कोकणवासीयांना दुहेरी आरोग्यदायी भेट

रत्नागिरीत शासकीय वैद्यकी महाविद्यालय
सिंधुदुर्गात ५०० रुग्णखाटांचे रुग्णालय

 मुंबई, दि. १७ : रत्नागिरी (Ratnagiri) येथे शासकीय वैद्यकीय महाविद्यालय (Government medical college) आणि सिंधुदुर्ग (Sindhugurg) येथे शासकीय वैद्यकीय महाविद्यालयास संलग्नित ५०० रुग्णखाटांच्या रुग्णालय अशा रुपात कोकणवासीयांना (Konkan) शासनाने दुहेरी आरोग्यदायी भेट दिली आहे.

रत्नागिरी येथे १०० विद्यार्थी क्षमतेसह संलग्नित ४३० खाटांचे रुग्णालय सुरु करण्यास मागील वर्षी मान्यता देण्यात आली होती. आता रत्नागिरी वैद्यकीय महाविद्यालयासाठी ४४८ पदनिर्मितीस मान्यता देण्यात आली असून याकरिता रु. १०५.७८ कोटी खर्चासही मान्यता देण्यात आली असल्याची माहिती ग्रामविकास, वैद्यकीय शिक्षण आणि क्रीडामंत्री गिरीष महाजन यांनी दिली.

नऊ वर्षांत दहा वैद्यकीय महाविद्यालये

महाजन म्हणाले की, युती शासनाच्या मागील ९ वर्षात १० शासकीय वैद्यकीय महाविद्यालये सुरु करण्यात आली आहेत. रत्नागिरी येथील शासकीय वैद्यकीय महाविद्यालयाच्या तसेच सिंधुदुर्ग येथील शासकीय वैद्यकीय महाविद्यालयास संलग्नित ५०० रुग्णखाटांच्या रुग्णालयाच्या रुपात कोकणवासीयांना  शासनाने  दुहेरी आरोग्यदायी भेट दिली आहे. स्वातंत्र्यानंतर मागील जवळपास ६० वर्षात केवळ ११ शासकीय वैद्यकीय महाविद्यालये सुरु करण्यात आली आहेत. तर सन २०१४ पासून २०२३ पर्यंत ९ वर्षात १० वैद्यकीय महाविद्यालये राज्यात सुरु करण्यात आली आहेत. त्यामुळे दरवर्षी हजारो नवीन डॉक्टर्स निर्माण होऊन राज्यभर आरोग्य सेवेचा विस्तार होणार आहे. ज्या जिल्ह्यात शासकीय वैद्यकीय महाविद्यालये नाहीत, अशा ९ जिल्ह्यांमध्ये नवीन शासकीय वैद्यकीय महाविद्यालये सुरु करण्याच्या प्रस्तावास लवकरच मान्यता देण्यात येणार असल्याचेही महाजन यांनी यावेळी सांगितले.

प्रथम वर्षांचे प्रवेश सुरू

रत्नागिरी येथील शासकीय वैद्यकीय महाविद्याल सन २०२३-२०२४ या शैक्षणिक वर्षापासून सुरु करण्यास केंद्राचा हिरवा कंदील मिळाला असून या शैक्षणिक वर्षापासून प्रथम वर्षाचे प्रवेश सुरु होणार असल्याचे महाजन यांनी सांगितले. सिंधुदुर्ग येथे नवीन शासकीय वैद्यकीय महाविद्यालयाशी संलग्नित ५०० रुग्णखाटांच्या रुग्णालयाकरिता आवश्यक एकूण १०८६ पदनिर्मीतीसही मान्यतेचा शासन निर्णय काढण्यात आला असून त्यापोटी १०९.१९ कोटी रुपयांचा भार शासनाच्या तिजोरीवर पडणार आहे. सिंधुदुर्ग येथील शासकीय वैद्यकीय महाविद्यालय यापूर्वीच सुरु झाले आहे.

आरोग्य विषय दर्जेदार सुविधा

रत्नागिरी आणि सिंधुदुर्गात वैद्यकीय महाविद्यालये सुरू झाल्याने कोकणातील सर्वसामान्य नागरिकांना विशेषोपचार आरोग्य सुविधा माफक दरात उपलब्‍ध होणार आहेत. यामुळे नागरिकांच्या आरोग्यावरील खर्चात बचत होणार आहे. कोकणातील आसपासच्या ग्रामीण भागातील नागरिकांना आरोग्यविषयक चांगल्या सोयीसुविधा मिळण्याचा मार्ग आता मोकळा झाला असून या महत्त्वपूर्ण निर्णयाचे सामान्य नागरिकांतून स्वागत केले जात आहे.

या विभागातील इतर बातम्या

सर्वाधिक प्रसिद्ध